ab zamaane se aur kyaa maangun — Azmat Abdul Qayyum Khan

jo bijliyon ki panaahon mein tum banaa sakte
to is qadar na tumhein khauf-e-aashiyaan hotaa

manzil pe nazar aai bahut duri-e-manzil
be-saakhta aane lage sab raah-numaa yaad

aabaad mai-kade bhi hain dair-o-haram bhi nahin
lekin na aadmi ko milaa koi aadmi

zindagaani kaa lutf to 'azmat'
sirf tufaan ki panaah mein hai

ye baat bhi hai ki tu bhi nahin hai ab meraa
ye baat bhi hai ki tere sivaa nahin koi

kal ye mumkin hai ki lahraaein khushi ke giit bhi
har nazar mein aaj ik khaamosh saa aalam sahi

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

tumhaare hisse ke jitne bhi gham hain main le luun
mire nasib ki har ik khushi mile tum ko

nashtar-e-gham na jis ko raas aayaa
ziist us ko kabhi na raas aai

ek dard ki lazzat barqaraar rakhne ko
kuchh latif jazbon ki khuun se aabyaari ki