ajiib Dhang se taqsim-e-kaar ki us ne — Bilal Ahmad

zamin nai thi anaasir ki khu badalti thi
havaa se pahle jazire pe dhuup chalti thi

ajiib qaid thi jis mein bahut khushi thi mujhe
ab ashk thamte nahin hain ye kyaa rihaa huaa main

hamaari khaak tabarruk samajh ke le jaao
hamaari jaan mohabbat ki lau mein jalti thi

sunaa hai main ne aziyyat maza bhi deti hai
sunaa hai dil ki khalish mein sakun bhi hotaa hai

ek kaanTe ki khaTak se dil miraa aabaad thaa
vo gayaa to dil se mere dard ki raahat gai

ek haalat thi miri aur ek haalat dil ki thi
meri haalat to vahi hai dil ki vo haalat gai

main baDaa ho gayaa huun magar bachpanaa
mere dil se kabhi bhi gayaa hi nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

'saif' andaaz-e-bayaan rang badal detaa hai
varna duniyaa mein koi baat nai baat nahin

ye dil hai dil ise siine mein hargiz
kabhi rakhnaa na tum patthar banaa ke

miraa ghar jalaane vaale mujhe fikr hai tiri bhi
ki havaa kaa rukh jo badlaa tiraa ghar bhi jal na jaae

mataa-e-dard maaal-e-hayaat hai shaayad
dil-e-shikasta miri kaaenaat hai shaayad