hamaari khaak tabarruk samajh ke le jaao — Bilal Ahmad

zamin nai thi anaasir ki khu badalti thi
havaa se pahle jazire pe dhuup chalti thi

ajiib qaid thi jis mein bahut khushi thi mujhe
ab ashk thamte nahin hain ye kyaa rihaa huaa main

sunaa hai main ne aziyyat maza bhi deti hai
sunaa hai dil ki khalish mein sakun bhi hotaa hai

ek kaanTe ki khaTak se dil miraa aabaad thaa
vo gayaa to dil se mere dard ki raahat gai

ajiib Dhang se taqsim-e-kaar ki us ne
so jis ko dil na diyaa us ko dilrubaai di

ek haalat thi miri aur ek haalat dil ki thi
meri haalat to vahi hai dil ki vo haalat gai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

ham to apnon se bhi begaana hue ulfat mein
tum jo ghairon se mile tum ko na ghairat aai