agar dard-e-mohabbat se na insaan aashnaa hotaa — Chakbast Braj Narayan

kiyaa hai faash parda kufr-o-din kaa is qadar main ne
ki dushman hai barhaman aur adu shaikh-e-haram meraa

vatan ki khaak se mar kar bhi ham ko uns baaqi hai
mazaa daamaan-e-maadar kaa hai is miTTi ke daaman mein

zindagi kyaa hai anaasir mein zuhur-e-tartib
maut kyaa hai inhin ajzaa kaa pareshaan honaa

adab taalim kaa jauhar hai zevar hai javaani kaa
vahi shaagird hain jo khidmat-e-ustaad karte hain

ik silsila havas kaa hai insaan ki zindagi
is ek musht-e-khaak ko gham do-jahaan ke hain

hai miraa zabt-e-junun josh-e-junun se baDh kar
nang hai mere liye chaak-e-garebaan honaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

zikr se rindon ke vaaiz tu abhi vaaqif nahin
ye to hu-haq ki sadaa hai shor-e-rindaana nahin

aks-e-zulf-e-ravaan nahin jaataa
dil se gham kaa dhuaan nahin jaataa

is shor-e-talaatum mein koi kis ko pukaare
kaanon mein yahaan apni sadaa tak nahin aati