gar tarannum par hi 'daanish' munhasir hai shaairi — Danish Aligarhi

rudaad-e-shab-e-gham yuun Dartaa huun sunaane se
mahfil mein kahin un ki surat na utar jaae

zarre zarre mein mahak pyaar ki Daali jaae
bu taassub ki har ik dil se nikaali jaae

muskuraa kar un kaa milnaa aur bichhaDnaa ruuTh kar
bas yahi do lafz ik din daastaan ho jaaeinge

aakhiri vaqt talak saath andheron ne diyaa
raas aate nahin duniyaa ke ujaale mujh ko

tere firaaq ne ki zindagi ataa mujh ko
teraa visaal jo miltaa to mar gayaa hotaa

ho ke majbur ye bachchon ko sabaq denaa hai
ab qalam chhoD ke talvaar uThaa li jaae

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

sukut tark-e-taalluq kaa ik garaan lamha
banaa gayaa hai sadaaon kaa silsila mujh ko

ghar ke dukhDe shahr ke gham aur des bides ki chintaaein
in mein kuchh aavaara kutte hain kuchh ham ne paale hain

ranj-o-gham uThaae hain fikr-o-fan bhi paae hain
zindagi ko jitnaa bhi ji sake jiyaa ham ne