yahaan to phuul bhi aapas mein baat karte hain — Devang Thakur

sab ko bataa diyaa ki main behad udaas huun
itni si baat ko bhi khabar kar diyaa gayaa

ghar ke andar itne ghar hain is ko kaise toDun main
yaar kabutar rahte hain is ghar ke raushan-daanon mein

tumhein dekhtaa huun so zinda huun main
mujhe saans aati hai aankhon se ab

sar paTak kar dekhnaa hai ek baar
'ishq ko patthar kahaa thaa 'mir' ne

us ke dil se nikle to ham khud ke dil tak aa pahunche
aanaa jaanaa hotaa rahtaa hai apnaa viraanon mein

milnaa hai teri ruuh se ham ko badan baghair
apnaa libaas-e-jism utaare hue hain ham

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

ulfat ne tiri ham ko to rakkhaa na kahin kaa
dariyaa kaa na jangal kaa samaa kaa na zamin kaa

gilauri raqibon ne bheji hai saahab
kisi aur ko bhi khilaa lijiyegaa

aankh ko nam kiye baghair dil ko buraa kiye baghair
us ki gali se aa gae ham to sadaa kiye baghair