shaairi naam tasavvur mein chhalakti mai kaa — Dinesh Kumar

dekho darakht kaaTne se pahle ek baar
in sabz Tahniyon pe koi ghonsla na ho

mujh ko saphaltaa baiThe biThaae nahin mili
main ne guhar talaashe hain dariyaa khangaal kar

maraasim barf mein dabne na paaein
qarib aao december aa rahaa hai

kar ke taarif vo miri jhuTi
zahr dhimaa chaTaa gayaa hai mujhe

haaT pe kyaa biktaa thaa ham ko kyaa matlab
apni jeb mein bas khvaabon ke sikke the

dekho to kaam ek bhi ham ne kahaan kiyaa
puchho to ek pal ki bhi fursat nahin rahi

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

ajnabi shahr mein kuchh khauf saa mahsus huaa
oDh li main ne khamoshi se utaari hui raat

vo gham ataa kiyaa dil-e-divaana jal gayaa
aisi bhi kyaa sharaab ki paimaana jal gayaa

ik na ik din to chukaanaa hai khamoshi kaa hisaab
jaante sab hain magar boltaa koi nahin hai

nashe mein Duub ke zakhm-e-sadaa hue bhi to kyaa
khud apni khaak kuchal kar khudaa hue bhi to kyaa