ik na ik din to chukaanaa hai khamoshi kaa hisaab — Moid Rasheedi

bichhaDte vaqt kahnaa thaa bahut kuchh
main kyaa kahtaa judaa hone se pahle

vo chaahte hain ki har baat maan li jaae
aur ek main huun ki har baat kaaT detaa huun

ab eatibaar nahin meri jaan kisi kaa nahin
charaagh sab ke liye hai dhuaan kisi kaa nahin

havas ki dhuup mein phailaa hai shor-e-khalq-e-khudaa
sunaa kisi ne nahin bastiyon mein girya-e-khaak

mujh ko paane ki tamanna mein vo gharqaab huaa
main ne saahil ki tamanna mein use khoyaa hai

itnaa aasaan nahin lafzon ko ghazal kar lenaa
shor ko sher banaane mein jigar lagtaa hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

ilaaj us kaa guzar jaanaa hai jaan se
guzar jaane kaa jaan se Dar rahegaa

khud ko aziyyatein na de mujh ko aziyyatein na de
khud pe bhi ikhtiyaar rakh mujh pe bhi e'tibaar kar

main ab to shahr mein is baat se pahchaanaa jaataa huun
tumhaaraa zikr karnaa aur karte hi chale jaanaa