mire alfaaz mein us ki halaavat ho gai daakhil — Erum Zehra

dil ki dharti par vafaa kaa moajiza rakkhaa gayaa
phir dilon ke darmiyaan kyuun faasla rakkhaa gayaa

meri sochon par usi ki dastaras hone lagi
us ki saari jiit meri maat se mansub hai

sochaa hi nahin tum ne zaraa baat se pahle
kyon shart rakhi tum ne mulaaqaat se pahle

is baar to munsif se koi chuuk hui hai
kyon jiit kaa elaan huaa maat se pahle

samundar kaa kinaara chhoDnaa aasaan nahin hotaa
karachi shahr ki shaamein suhaani chhoD aai huun

hamaare zarf kaa logon ne imtihaan liyaa
zaraa si baat kaa dil mein malaal kyaa rakhte

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

gul kiyaa jis ne vo thaa aur magar
shama ne shikva havaaon se kiyaa

maarka garm to ho lene do khun-rezi kaa
pahle shamshir ke niche hamin jaa baiTheinge

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

vo har maqaam se pahle vo har maqaam ke baad
sahar thi shaam se pahle sahar hai shaam ke baad

khaamosh is tarah se na jal kar dhuaan uThaa
ai shama kuchh to bol kabhi to zabaan uThaa