do dariyaa bhi jab aapas mein milte hain — Farigh Bukhari

kitne shikve gile hain pahle hi
raah mein faasle hain pahle hi

jitne the tere mahke hue aanchalon ke rang
sab titliyon ne aur dhanak ne uDaa liye

safar mein koi kisi ke liye Thahartaa nahin
na muD ke dekhaa kabhi saahilon ko dariyaa ne

pukaaraa jab mujhe tanhaai ne to yaad aayaa
ki apne saath bahut mukhtasar rahaa huun main

yahi hai daur-e-gham-e-aashiqi to kyaa hogaa
isi tarah se kaTi zindagi to kyaa hogaa

jalte mausam mein koi faarigh nazar aataa nahin
Dubtaa jaataa hai har ik peD apni chhaanv mein

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

kamaanon mein khinche hain tiir talvaarein hain chamki
zaraa Thahro kahaan jaate ho dariyaa dekhne ko

bole vo apni shakl ko aap aaine mein dekh
dariyaa ke paar aur gulistaan hai dusraa

behtar hai ki ab khud se judaa ho ke bhi dekhein
dariyaa mein to dariyaa kaa havaala nahin miltaa

naqaab uThaao to har shai ko paaoge saalim
ye kaaenaat ba-taur-e-hijaab TuTti hai

agarche kahne ko kal kaaenaat apni thi
haqiqatan kahaan apni bhi zaat apni thi