pukaaraa jab mujhe tanhaai ne to yaad aayaa — Farigh Bukhari

kitne shikve gile hain pahle hi
raah mein faasle hain pahle hi

jitne the tere mahke hue aanchalon ke rang
sab titliyon ne aur dhanak ne uDaa liye

safar mein koi kisi ke liye Thahartaa nahin
na muD ke dekhaa kabhi saahilon ko dariyaa ne

do dariyaa bhi jab aapas mein milte hain
donon apni apni pyaas bujhaate hain

yahi hai daur-e-gham-e-aashiqi to kyaa hogaa
isi tarah se kaTi zindagi to kyaa hogaa

jalte mausam mein koi faarigh nazar aataa nahin
Dubtaa jaataa hai har ik peD apni chhaanv mein

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

uThti chali gai hai koi aur hi sadaa
ik aah-e-sard thi ki dabi ki dabi rahi

simaTti phailti tanhaai sote jaagte dard
vo apne aur mire darmiyaan chhoD gayaa

saayaa na un ke saath jo dekhaa gayaa kabhi
ham jaise aasiyon ke saron par rahaa sadaa