kitne shikve gile hain pahle hi — Farigh Bukhari

jitne the tere mahke hue aanchalon ke rang
sab titliyon ne aur dhanak ne uDaa liye

safar mein koi kisi ke liye Thahartaa nahin
na muD ke dekhaa kabhi saahilon ko dariyaa ne

pukaaraa jab mujhe tanhaai ne to yaad aayaa
ki apne saath bahut mukhtasar rahaa huun main

do dariyaa bhi jab aapas mein milte hain
donon apni apni pyaas bujhaate hain

yahi hai daur-e-gham-e-aashiqi to kyaa hogaa
isi tarah se kaTi zindagi to kyaa hogaa

jalte mausam mein koi faarigh nazar aataa nahin
Dubtaa jaataa hai har ik peD apni chhaanv mein

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

aai vo rafta rafta taqaddus ki raah tak
phir yuun huaa ki niyyat-e-naaseh bigaD gai

vo chaahte hain ki manzil kaa zikr to aae
magar kahaani se rasta haTaa liyaa jaae