ishq jab se mujhe mayassar hai — Fauziya Rabab

mujh se puchhaa jo kisi ne tiri pahchaan bataa
main pukaari main tumhaari main tumhaari maulaa

kuza-gar main tiri mohabbat mein
apni surat bigaaD leti huun

vaqt jab aaina dikhaataa hai
aadmi khud ko bhuul jaataa hai

aaj phir tum ko ham ne dekhaa hai
aaj mahshar bani hain ye aankhein

mujh ko har lamha miri maan se mohabbat hai 'rabaab'
main kisi roz bhulaa duun use mumkin hi nahin

jab vo kahti hai yuun ki uf tauba
meri tauba hi TuuT jaati hai

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sabhi se jab mohabbat chaahte ho
mohabbat kyon nahin karte sabhi se

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

dil-e-haris hi apnaa na ho sakaa qaane
vagarna tere karam mein to kuchh kami na rahi

husn jalva dikhaa gayaa apnaa
ishq baiThaa rahaa udaas kahin