ishq mein khuub niin bahut ronaa — Gulam Yahya Huzur Azimabadi

kahun ki shaikh-e-zamaana huun laaf to ye hai
main apne but kaa barahman huun saaf to ye hai

ishq mein dard se hai hurmat-e-dil
chashm ko aabru hai aansu se

shab-e-hijr mein ek din dekhnaa
agar zindagi hai to mar jaaeinge

kabhi haath bhi aaegaa yaar sach kah
yaa yunhi tu baatein banaataa rahegaa

na tu jaldi kar ai dast-e-junun naaseh ko siine de
bahaar aa pahunchi ab koi Thaharte hain rafu is ke

yaar gar puchhe to kiije kuchh arz
baat par baat kahi jaati hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

raah mein gham-zada-e-ishq ko kyaa Toko ho
apni haalat mein giraftaar chalaa jaataa hai

aai hai tire ishq ki baazi dil-o-jaan par
is vaqt nazar kab hai mujhe sud-o-ziyaan par

nigaah-e-ishq dil-e-zinda ki talaash mein hai
shikaar-e-murda sazaa-vaar-e-shaahbaaz nahin