in talkh aansuon ko na yuun munh banaa ke pi — Hafeez Jalandhari

ai miri jaan apne ji ke sivaa
kaun teraa hai kaun meraa hai

'hafiz' apni boli mohabbat ki boli
na urdu na hindi na hindostaani

iraade baandhtaa huun sochtaa huun toD detaa huun
kahin aisaa na ho jaae kahin aisaa na ho jaae

doston ko bhi mile dard ki daulat yaa rab
meraa apnaa hi bhalaa ho mujhe manzur nahin

vafaa jis se ki bevafaa ho gayaa
jise but banaayaa khudaa ho gayaa

dekhaa jo khaa ke tiir kamin-gaah ki taraf
apne hi doston se mulaaqaat ho gai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

shiddat-e-gham se har ik kutte ko tap chaDhne lagaa
bole ab insaan hamaari ham-sari karne lagaa

sirf zinda rahne ko zindagi nahin kahte
kuchh gham-e-mohabbat ho kuchh gham-e-jahaan yaaro

ye kaisaa qaafila hai jis mein saare log tanhaa hain
ye kis barzakh mein hain ham sab tumhein bhi sochnaa hogaa