ye bhi ik dhokaa thaa nairang-e-tilism-e-aql kaa — Hafeez Jalandhari

dekhaa jo khaa ke tiir kamin-gaah ki taraf
apne hi doston se mulaaqaat ho gai

doston ko bhi mile dard ki daulat yaa rab
meraa apnaa hi bhalaa ho mujhe manzur nahin

vafaa jis se ki bevafaa ho gayaa
jise but banaayaa khudaa ho gayaa

ham hi mein thi na koi baat yaad na tum ko aa sake
tum ne hamein bhulaa diyaa ham na tumhein bhulaa sake

kyuun hijr ke shikve kartaa hai kyuun dard ke rone rotaa hai
ab ishq kiyaa to sabr bhi kar is mein to yahi kuchh hotaa hai

iraade baandhtaa huun sochtaa huun toD detaa huun
kahin aisaa na ho jaae kahin aisaa na ho jaae

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ai shahr-e-sitam-zaad tiri umr baDi ho
kuchh aur bataa naql-e-makaani ke alaava

har fikr sirf jaagne vaale kaa hai nasib
jo so rahaa hai bas vahi banda maze mein hai

ye pahlaa ishq hai tumhaaraa soch lo
mire liye ye raastaa nayaa nahin

ab itnaa aql se begaana ho gayaa huun main
gulon ke shikve sitaaron se kah rahaa huun main