ye pahlaa ishq hai tumhaaraa soch lo — Azhar Iqbal

ghuTan si hone lagi us ke paas jaate hue
main khud se ruuTh gayaa huun use manaate hue

ye kaifiyat hai meri jaan ab tujhe kho kar
ki ham ne khud ko bhi paayaa nahin bahut din se

har ek shakhs yahaan mahv-e-khvaab lagtaa hai
kisi ne ham ko jagaayaa nahin bahut din se

hai ab bhi bistar-e-jaan par tire badan ki shikan
main khud hi miTne lagaa huun use miTaate hue

ek muddat se hain safar mein ham
ghar mein rah kar bhi jaise beghar se

na jaane khatm hui kab hamaari aazaadi
taalluqaat ki paabandiyaan nibhaate hue

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

kam hai kuchh kundan se kyaa chehre kaa us ke rang-e-zard
ishq kar ke 'mushafi' tu kimiyaa-gar ho gayaa

na aayaa shaam bhi ghar phir ke apne
tamaashaai-e-baazaar-e-mohabbat

jaanib-e-kaaba tu kyuun le gayaa but-khaane se
mujh se divaane ko ai ishq na bahkaanaa thaa