bhulaa na paayaa use jis ko bhuul jaanaa thaa — Haidar Ali Jafri

sabhi to dost hain kyuun shak abas huaa mujh ko
kisi ke haath kaa patthar miri talaash mein hai

aae Thahre aur ravaana ho gae
zindagi kyaa hai, safar ki baat hai

khuun mazdur kaa miltaa jo na taamiron mein
na haveli na mahal aur na koi ghar hotaa

kis ki sadaa fazaaon mein gunji hai chaar-su
kis ne mujhe pukaaraa hai bachpan ke naam se

kyaa zaruri hai ju-e-shir ki baat
kyuun na gang-o-jaman ki baat karein

khinch detaa main zamaane pe mohabbat ke nuqush
mere qabze mein agar khaama-e-shahpar hotaa

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

mujhe bhi fursat-e-nazzaara-e-jamaal na thi
aur us ko paas kisi aur ke bhi jaanaa thaa

maanaa apni jaan ko vo bhi dil kaa rog lagaaeinge
ahl-e-junun khud kyaa samjhe hain naaseh kyaa samjhaaeinge

tere hote to bayaabaan bhi the gulshan saare
tu nahin hai to ye duniyaa hai bayaabaan jaanaan

main dariyaa huun magar bahtaa huun main kohsaar ki jaanib
mujhe duniyaa ki pasti mein utar jaanaa nahin aataa