jaane kis kis kaa galaa kaTtaa pas-e-parda-e-ishq — Hosh Jaunpuri

mere hi paanv mire sab se baDe dushman hain
jab bhi uThte hain usi dar ki taraf jaate hain

khudaa badal na sakaa aadmi ko aaj bhi 'hosh'
aur ab tak aadmi ne saikDon khudaa badle

miTTi mein kitne phuul paDe sukhte rahe
rangin pattharon se bahaltaa rahaa huun main

divaar un ke ghar ki miri dhuup le gai
ye baat bhulne mein zamaana lagaa mujhe

kyaa sitam karte hain miTTi ke khilaune vaale
raam ko rakkhe hue baiThe hain raavan ke qarib

aane vaale daur mein jo paaegaa paighambari
meraa chehra meraa dil meri zabaan le jaaegaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

mohabbat kaa un ko yaqin aa chalaa hai
haqiqat bane jaa rahe hain fasaane

mohabbat ratjage aavaaragardi
zaruri kaam saare ho rahe hain

phir kisi ki bazm kaa aayaa khayaal
phir dhuaan uTThaa dil-e-naakaam se

kuchh is tarah tiri ulfat mein kaaT di main ne
gunaahgaar huaa aur na paak-baaz rahaa