aane vaale daur mein jo paaegaa paighambari — Hosh Jaunpuri

mere hi paanv mire sab se baDe dushman hain
jab bhi uThte hain usi dar ki taraf jaate hain

khudaa badal na sakaa aadmi ko aaj bhi 'hosh'
aur ab tak aadmi ne saikDon khudaa badle

miTTi mein kitne phuul paDe sukhte rahe
rangin pattharon se bahaltaa rahaa huun main

divaar un ke ghar ki miri dhuup le gai
ye baat bhulne mein zamaana lagaa mujhe

kyaa sitam karte hain miTTi ke khilaune vaale
raam ko rakkhe hue baiThe hain raavan ke qarib

jaane kis kis kaa galaa kaTtaa pas-e-parda-e-ishq
khul gae meri shahaadat mein sitamgar kitne

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

junun-aasaar mausam kaa pata koi nahin degaa
tujhe ai dasht-e-tanhaai sadaa koi nahin degaa

tiraa mariz huun main doctor kaa ghar na bataa
ye dard-e-ishq hai zaalim koi bukhaar nahin

chhoD kar baar-e-sadaa vo be-sadaa ho jaaegaa
vahm thaa meraa ki patthar aaina ho jaaegaa