na ham se ishq kaa mafhum puchho — Humaira Rahat

jahaan ik shakhs bhi miltaa nahin hai chaahne se
vahaan ye dil hatheli par zamaana chaahtaa hai

bahut taakhir se paayaa hai khud ko
main apne sabr kaa phal ho gai huun

sunaa hai khvaab mukammal kabhi nahin hote
sunaa hai ishq khataa hai so kar ke dekhte hain

huzur aap koi faisla karein to sahi
hain sar jhuke hue darbaar bhi lagaa huaa hai

zikr sunti huun ujaale kaa bahut
us se kahnaa ki mire ghar aae

guzar jaaegi saari raat is mein
miraa qissa kahaani se baDaa hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

laundry kholi thi us ke ishq mein
par vo kapDe ham se dhulvaataa nahin

aahon se soz-e-ishq miTaayaa na jaaegaa
phunkon se ye charaagh bujhaayaa na jaaegaa

khushaamad ai dil-e-betaab is tasvir ki kab tak
ye bolaa chaahti hai par na bolegi na boli hai