bikhre hue the log khud apne vajud mein — Ibrahim Ashk

na dil mein koi gham rahe na meri aankh nam rahe
har ek dard ko miTaa sharaab laa sharaab de

ye aur baat hai ki barhana thi zindagi
maujud phir bhi mere badan par libaas thaa

kis liye katraa ke jaataa hai musaafir dam to le
aaj sukhaa peD huun kal teraa saayaa main hi thaa

koi to hogaa jis ko miraa intizaar hai
kahtaa hai dil ke shahr-e-tamannaa mein le ke chal

nahin hai tum mein saliqa jo ghar banaane kaa
to 'ashk' jaao parindon ke aashiyaan dekho

zindagi apni musalsal chaahaton kaa ik safar
is safar mein baar-haa mil kar bichhaD jaataa hai vo

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

kuchh na puchho daraazi-e-shab-e-hijr
kaT gai 'umr aur sahar na hui

kyaa khabar thi is qadar pur-kaif naghme hain nihaan
zindagi ko ek saaz-e-be-sadaa samjhaa thaa main