kyaa khabar thi is qadar pur-kaif naghme hain nihaan — Mustafa Rahi

shaayad hi raas aae mujhe aish-e-marg bhi
'raahi' gham-e-hayaat kaa maaraa huaa huun main

allaah tere haath hai khuddaariyon ki laaj
daanista haadsaat se Takraa gayaa huun main

be-khudi mein shaan-e-khuddaari bhi hai
khvaab mein ehsaas-e-bedaari bhi hai

dil dhaDaktaa hai sitaaron kaa yahaan
uf ye duniyaa kis qadar taarik hai

na samjhaa koi asraar-e-mohabbat
jo samjhaa kuchh dil-e-naadaan samjhaa

dekhiye kab tak yahi haalat yahi aalam rahe
dil ki har dhaDkan ye kahti hai ki vo aane ko hain

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

sadaaein jism ki divaar paar karti hain
koi pukaar rahaa hai magar kahaan se mujhe

band rahte hain jo alfaaz kitaabon mein sadaa
gardish-e-vaqt miTaa deti hai pahchaan un ki

ai shaaer! teraa dard baDaa ai shaaer! teri soch baDi
ai shaaer! tere siine mein is jaisaa laakh bahe dariyaa