zindagi apni musalsal chaahaton kaa ik safar — Ibrahim Ashk

na dil mein koi gham rahe na meri aankh nam rahe
har ek dard ko miTaa sharaab laa sharaab de

ye aur baat hai ki barhana thi zindagi
maujud phir bhi mere badan par libaas thaa

kis liye katraa ke jaataa hai musaafir dam to le
aaj sukhaa peD huun kal teraa saayaa main hi thaa

koi to hogaa jis ko miraa intizaar hai
kahtaa hai dil ke shahr-e-tamannaa mein le ke chal

nahin hai tum mein saliqa jo ghar banaane kaa
to 'ashk' jaao parindon ke aashiyaan dekho

bikhre hue the log khud apne vajud mein
insaan ki zindagi kaa ajab bandobast thaa

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

masrur ho rahe hain gham-e-aashiqi se ham
kyuun tang honge kashmakash-e-zindagi se ham