agar vo chaand ki basti kaa rahne vaalaa thaa — Iffat Zarrin

vo mujh ko bhuul chukaa ab yaqin hai varna
vafaa nahin to jafaaon kaa silsila rakhtaa

zehn o dil ke faasle the ham jinhein sahte rahe
ek hi ghar mein bahut se ajnabi rahte rahe

patthar ke jism mom ke chehre dhuaan dhuaan
kis shahr mein uDaa ke havaa le gai mujhe

vo mil gayaa to bichhaDnaa paDegaa phir 'zarrin'
isi khayaal se ham raaste badalte rahe

dekh kar insaan ki bechaargi
shaam se pahle parinde so gae

kaun pahchaanegaa 'zarrin' mujh ko itni bhiiD mein
mere chehre se vo apni har nishaani le gayaa

vo chaand hai to aks bhi paani mein aaegaa
kirdaar khud ubhar ke kahaani mein aaegaa

saavan ki is rim-jhim mein
bhiig rahaa hai tanhaa chaand

kitnaa pyaaraa lagtaa hai
hotaa hai jab puuraa chaand

ye raas rang ye mel milan ik haath mein chaand ik mein suraj
ik raat kaa mauj maza saaraa ik din kaa sair-sapaaTaa hai

eid kaa chaand tum ne dekh liyaa
chaand ki eid ho gai hogi

chaand suraj zamin se ugte hain
shaairi jab jadid hoti hai