khudaa! sila de duaa kaa, mohabbaton ke khudaa — Iftikhar Mughal

ham ne us chehre ko baandhaa nahin mahtaab-misaal
ham ne mahtaab ko us rukh ke mumaasil baandhaa

gher leti hai koi zulf, koi bu-e-badan
jaan kar koi giraftaar nahin hotaa yaar

mohabbat aur ibaadat mein farq to hai naan
so chhin li hai tiri dosti mohabbat ne

main tum ko khud se judaa kar ke kis tarah dekhun
ki main bhi ''tum'' huun, koi dusraa nahin huun main

kai dinon se mire saath saath chalti hai
koi udaas si ThanDi si koi parchhaain

tu mujh se mere zamaanon kaa puchhti hai to sun!
tiraa junun, tiraa saudaa, tiri talab, tiri yaad

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sabhi se jab mohabbat chaahte ho
mohabbat kyon nahin karte sabhi se

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

kisi se ishq apnaa kyaa chhupaaein
mohabbat Tapki paDti hai nazar se