chand yaadein hain chand sapne hain — Iftikhar Raghib

inkaar hi kar dijiye iqraar nahin to
uljhan hi mein mar jaaegaa bimaar nahin to

'raaghib' vo meri fikr mein khud ko bhi bhuul jaaein
aisi to koi baat nahin chaahtaa thaa main

ji chaahtaa hai jiinaa jazbaat ke mutaabiq
haalaat kar rahe hain haalaat ke mutaabiq

din mein aane lage hain khvaab mujhe
us ne bhejaa hai ik gulaab mujhe

le jaae jahaan chaahe havaa ham ko uDaa kar
TuuTe hue patton ki hikaayat hi alag hai

paDhtaa rahtaa huun aap kaa chehra
achchhi lagti hai ye kitaab mujhe

mere khvaabon ke jharokon ko sajaate rahiye
na sahi vasl magar yaad to aate rahiye

dilon pe dard kaa imkaan bhi ziyaada nahin
vo sabr hai abhi nuqsaan bhi ziyaada nahin

be-barse guzar jaate hain umDe hue baadal
jaise unhein meraa hi pataa yaad nahin hai

lete hain tiraa naam hi yuun jaagte sote
jaise ki hamein apnaa khudaa yaad nahin hai

yaad aai na kabhi be-sar-o-saamaani mein
dekh kar ghar ko gharib-ul-vatani yaad aai

armaan ke taabut mein jab main vaqt ki kilein gaaD chukungaa
phir jab bhi tum yaad aaoge bah jaaoge ashkon mein