kyon hain tufaan ki zad mein haram-o-dair-o-kunisht — Ijtiba Rizvi

is hirs-o-havas ke mele mein ham jins-e-mohabbat laae hain
sab saste maal ke gaahak hain ye mahngaa saudaa kaun kare

sajda vo hai ba-rabb-e-kaaba
jis ko qaid-e-haram nahin hai

khuub tamaashaa ham ko banaayaa aap tamaashaa aap hue
ham ko rusvaa karne nikle kaise rusvaa aap hue

ye hamaari aap ki duriyaan ye kabhi kabhi ki huzuriyaan
hain ajab tarah ki lagaavTein rah-o-rasm-e-dur-o-daraaz mein

ek din rindon ne masjid mein namaaz aa ke paDhi
dusre din use mai-khaana banaa kar chhoDaa

khirad ko khaana-e-dil kaa nigah-baan kar diyaa ham ne
ye ghar aabaad hotaa is ko viraan kar diyaa ham ne

kinaaron se mujhe ai naakhudaao duur hi rakkho
vahaan le kar chalo tufaan jahaan se uThne vaalaa hai

ham gardish-e-girdaab-e-alam se nahin Darte
tufaan hai agar aaj kinaara bhi to hogaa

ham dil se rahe tez havaaon ke mukhaalif
jab tham gayaa tufaan to qadam ghar se nikaalaa

is adaa se vo jafaa karte hain
koi jaane ki vafaa karte hain

zikr-e-mehr-o-vafaa to ham karte
par tumhein sharmsaar kaun kare

bahut se gham to diye 'zabt' aise logon ne
ki jin se koi tavaqqo na thi vafaa ke sivaa