yahi fasaana rahaa hai junun ke sahraa mein — Indira Varma

tumhaare binaa sab adhure hain jaanaan
sabaa phuul khush-bu chaman raushni rang

ye shafaq chaand sitaare nahin achchhe lagte
tum nahin ho to nazaare nahin achchhe lagte

vaqt khaamosh hai TuuTe hue rishton ki tarah
vo bhalaa kaise mire dil ki khabar paaegaa

shikasta-dil andheri shab akelaa raahbar kyuun ho
na ho jab ham-safar koi to apnaa bhi safar kyuun ho

aap kaa lahja shahad jaisaa tarannum-khez hai
khaamushi ab toDiye aur boliye mere liye

kitaab-e-zist kaa unvaan ban gae ho tum
hamaare pyaar ki dekho ye intihaa saahab

vo ek raat to mujh se alag na soegaa
huaa jo lazzat-e-bos-o-kanaar se vaaqif

miri bahaar mein aalam khizaan kaa rahtaa hai
huaa jo vasl to khaTkaa rahaa judaai kaa

ye gham judaa hai bahut jald-baaz the ham tum
ye dukh alag hai abhi kaaenaat baaqi hai

firaaq-rut mein bhi kuchh lazzatein visaal ki hain
khayaal hi mein tire khaal-o-khad ubhaaraa karein

kabhi kabhi to ye dil mein savaal uThtaa hai
ki is judaai mein kyaa us ne paa liyaa hogaa

shab-e-firaaq ki zulmat hai naa-gavaar mujhe
naqaab uThaa ki sahar kaa hai intizaar mujhe