tumhaare binaa sab adhure hain jaanaan — Indira Varma

ye shafaq chaand sitaare nahin achchhe lagte
tum nahin ho to nazaare nahin achchhe lagte

yahi fasaana rahaa hai junun ke sahraa mein
kabhi firaaq ke qisse kabhi visaal ki baat

vaqt khaamosh hai TuuTe hue rishton ki tarah
vo bhalaa kaise mire dil ki khabar paaegaa

shikasta-dil andheri shab akelaa raahbar kyuun ho
na ho jab ham-safar koi to apnaa bhi safar kyuun ho

aap kaa lahja shahad jaisaa tarannum-khez hai
khaamushi ab toDiye aur boliye mere liye

kitaab-e-zist kaa unvaan ban gae ho tum
hamaare pyaar ki dekho ye intihaa saahab

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

tum ko paanaa nahin miraa maqsad
ab faqat tum ko bhuul jaanaa hai

maze jo teri qurbat ke the saare bhuul baiThe hain
mazaa furqat mein teri ham ko itnaa aa gayaa jaanaan

garmi se muztarib thaa zamaana zamin par
bhun jaataa thaa jo girtaa thaa daanaa zamin par

kuchh arz-e-tamannaa mein shikva na sitam kaa thaa
main ne to kahaa kyaa thaa aur aap ne kyaa jaanaa