kuchh khel nahin hai ishq karnaa — Ahmad Nadeem Qasmi

aaghosh mein mahkoge dikhaai nahin doge
tum nikhat-e-gulzaar ho ham parda-e-shab hain

gham-e-jaanaan gham-e-dauraan ki taraf yuun aayaa
jaanib shahar chale dukhtar-e-dahqaan jaise

zindagi shama ki maanind jalaataa huun 'nadim'
bujh to jaaungaa magar subah to kar jaaungaa

kis tavaqqoa pe kisi ko dekhein
koi tum se bhi hasin kyaa hogaa

ik safina hai tiri yaad agar
ik samundar hai miri tanhaai

aakhir duaa karein bhi to kis muddaaa ke saath
kaise zamin ki baat kahein aasmaan se ham

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ham bane the tabaah hone ko
aap kaa ishq to bahaana thaa

ishq kartaa hai to phir ishq ki tauhin na kar
yaa to behosh na ho, ho to na phir hosh mein aa

tum kaho tum bhi taDapte ho ta'alluq ke taiin
yaa mire hi dil-e-bismil ki ye bimaari hai

haan dil-e-be-taab chande intizaar
amn-o-raahat kaa Thikaana aur hai