raasta aage bhi le jaataa nahin — Jaleel 'Aali'

barg bhar baar mohabbat kaa uThaayaa kab thaa
tum ne siine mein koi dard basaayaa kab thaa

ham ki hain naqsh sar-e-reg-e-ravaank kyaa jaane
kab koi mauj-e-havaa apnaa nishaan le jaae

raasta sochte rahne se kidhar bantaa hai
sar mein saudaa ho to divaar mein dar bantaa hai

tumhaaraa kyaa tumhein aasaan bahut raste badalnaa hai
hamein har ek mausam qaafile ke saath chalnaa hai

jaan khapaate hain gham-e-ishq mein khush khush 'aali'
kaisi lazzat kaa ye aazaar banaayaa huaa hai

dil pe kuchh aur guzarti hai magar kyaa kiije
lafz kuchh aur hi izhaar kiye jaate hain

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

daanaaon ne ki daanaai muund liin aankhein
chauraahe par qatl huaa paagal ne dekhaa

ye lamha lamha takalluf ke TuTte rishte
na itne paas mire aa ki tu puraanaa lage

aql ne tark-e-taalluq ko ghanimat jaanaa
dil ko badle hue haalaat pe ronaa aayaa

ye maanaa vo shajar sukhaa bahut hai
magar us mein abhi saayaa bahut hai