barg bhar baar mohabbat kaa uThaayaa kab thaa — Jaleel 'Aali'

dil pe kuchh aur guzarti hai magar kyaa kiije
lafz kuchh aur hi izhaar kiye jaate hain

ham ki hain naqsh sar-e-reg-e-ravaank kyaa jaane
kab koi mauj-e-havaa apnaa nishaan le jaae

raasta sochte rahne se kidhar bantaa hai
sar mein saudaa ho to divaar mein dar bantaa hai

tumhaaraa kyaa tumhein aasaan bahut raste badalnaa hai
hamein har ek mausam qaafile ke saath chalnaa hai

jaan khapaate hain gham-e-ishq mein khush khush 'aali'
kaisi lazzat kaa ye aazaar banaayaa huaa hai

raasta aage bhi le jaataa nahin
lauT kar jaanaa bhi mushkil ho gayaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

musaafir hi musaafir har taraf hain
magar har shakhs tanhaa jaa rahaa hai

guzar to jaaegi tere baghair bhi lekin
bahut udaas bahut be-qaraar guzregi

zindagi ke udaas lamhon mein
bevafaa dost yaad aate hain