chhupaa na raaz mohabbat kaa bu-e-gul ki tarah — Jaleel Manikpuri

aaj hai vo bahaar kaa mausam
phuul toDun to haath jaam aae

pyaari surat vo haae kyaa hogi
jis ko be-dekhe pyaar aataa hai

sote mein vo jo mujh se ham-aaghosh ho gae
jitne gile the khvaab-e-faraamosh ho gae

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae

mohabbat ek taraf se mazaa nahin deti
kuchh iztiraab tujhe ho kuchh iztiraab mujhe

jo tire ishq mein tabaah huaa
koi us ko tabaah kar na sakaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

khaal aur rukh se kis ko duun nisbat
aise taare na aisaa pyaaraa chaand

safar mein ishq ke ik aisaa marhala aayaa
vo DhunDtaa thaa mujhe aur kho gayaa thaa main

rasm-e-jahaan na chhuT saki tark-e-ishq se
jab mil gae to pursish-e-haalaat ho gai

so gayaa vaqt ki dahliz pe sar rakkhe hue
main kahaan tak safar-e-ishq mein tanhaa jaataa