ham mohabbat kaa sabaq bhuul gae — Jameel Mazhari

jalaane vaale jalaate hi hain charaagh aakhir
ye kyaa kahaa ki havaa tez hai zamaane ki

hone do charaaghaan mahlon mein kyaa ham ko agar divaali hai
mazdur hain ham mazdur hain ham mazdur ki duniyaa kaali hai

kise khabar thi ki le kar charaagh-e-mustafavi
jahaan mein aag lagaati phiregi bu-lahabi

nahin afsun hi ko afsaane ki manzil maalum
ghalat aaghaaz kaa hotaa hi hai anjaam ghalat

ai sajda-farosh-e-ku-e-butaan har sar ke liye ik chaukhaT hai
ye bhi koi shaan-e-ishq hui jis dar pe gae sar phoD liyaa

buton ko toD ke aisaa khudaa banaanaa kyaa
buton ki tarah jo ham-shakl aadmi kaa ho

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

husn jalva dikhaa gayaa apnaa
ishq baiThaa rahaa udaas kahin

dil mein na ho jurat to mohabbat nahin milti
khairaat mein itni baDi daulat nahin milti