apne baare mein jab bhi sochaa hai — Jamil Nazar

dekhiye to hai kaarvaan varna
har musaafir safar mein tanhaa hai

be-vafaa hi sahi zamaane mein
ham kisi fan ki intihaa to hue

na qurb-e-zaat hi haasil na zakhm-e-rusvaai
ajiib lagtaa hai ab khud se raabta rakhnaa

baDaa ajiib hai tahzib-e-irteqaa ke liye
tamaam umr kisi ik ko ham-navaa rakhnaa

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

allaah-re be-khudi ki chalaa jaa rahaa huun main
manzil ko dekhtaa huaa kuchh sochtaa huaa

apne majnun ki zaraa dekh to be-parvaai
pairahan chaak hai aur fikr silaane ki nahin

main ajnabi huun magar tum kabhi jo sochoge
koi qarib kaa rishta zarur niklegaa

sazaa ke jhelne vaale ye sochnaa hai gunaah
koi qusur bhi tujh se kabhi huaa ki nahin