chhaanv chhaanv pukaartaa jaae — Jeem Jazil

rakkhi thi tasvir tumhaari aankhon mein
ham ne saari raat guzaari aankhon mein

main apne jism ke andar na dafn ho jaaun
mujhe vajud ke girte hue makaan se nikaal

ashk aankhon se ye kah kar niklaa
ye tire zabt ki had hai? had hai

ek bachcha saa be-sabab 'jaazil'
baiThaa rahtaa hai ruuTh kar mujh mein

zindagi tujh ko tire dard ke har ik pal ko
ham ne jis tarah guzaaraa hai khudaa jaantaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

ai aql saath rah ki paDegaa tujhi se kaam
raah-e-talab ki manzil-e-aakhir junun nahin

safar mein ab ke ajab tajraba nikal aayaa
bhaTak gayaa to nayaa raasta nikal aayaa