ek bachcha saa be-sabab 'jaazil' — Jeem Jazil

rakkhi thi tasvir tumhaari aankhon mein
ham ne saari raat guzaari aankhon mein

chhaanv chhaanv pukaartaa jaae
kaun karne lagaa safar mujh mein

main apne jism ke andar na dafn ho jaaun
mujhe vajud ke girte hue makaan se nikaal

ashk aankhon se ye kah kar niklaa
ye tire zabt ki had hai? had hai

zindagi tujh ko tire dard ke har ik pal ko
ham ne jis tarah guzaaraa hai khudaa jaantaa hai

main baDaa ho gayaa huun magar bachpanaa
mere dil se kabhi bhi gayaa hi nahin

umr hi teri guzar jaaegi un ke hal mein
teraa bachcha jo savaalaat liye baiThaa hai

hamaare jitne bachche the parinde ho gae saare
ye vo ghar hai jahaan par ab koi bachcha nahin rahtaa

ye bachpan ke saathi ki hai qabr 'saahil'
jo sab ko rulaa kar yahaan so rahaa hai

bachpan kitnaa pyaaraa thaa jab dil ko yaqin aa jaataa thaa
marte hain to ban jaate hain aasmaan ke taare log

sisakte the bachche bilakti thiin maaein
jo insaan bhi pyaas se naa-tavaan thaa