mahakte phuul sitaare damaktaa chaand dhanak — Ahmad Khayal

tu jo ye jaan hatheli pe liye phirtaa hai
teraa kirdaar kahaani se nikal saktaa hai

ye bhi ejaaz mujhe ishq ne bakhshaa thaa kabhi
us ki aavaaz se main diip jalaa saktaa thaa

havaa ke haath pe chhaale hain aaj tak maujud
mire charaagh ki lau mein kamaal aisaa thaa

ye bhi tiri shikast nahin hai to aur kyaa
jaisaa tu chaahtaa thaa main vaisaa nahin banaa

main thaa sadiyon ke safar mein 'ahmad'
aur sadiyon kaa safar thaa mujh mein

kisi darvesh ke hujre se abhi aayaa huun
so tire hukm ki taamil nahin karni mujhe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa