jaane kis khvaab-e-pareshaan kaa hai chakkar saaraa — Kausar Mazhari

mausam-e-dil jo kabhi zard saa hone lag jaae
apnaa dil khuun karo phuul ugaane lag jaao

giraa thaa bojh koi sar se mere
usi ko phir uThaanaa chaahtaa huun

vahi qatra jo kabhi kunj-e-sar-e-chashm mein thaa
ab jo phailaa hai to sailaab huaa jaataa hai

nazar jhuk rahi hai khamoshi hai lab par
hayaa hai adaa hai ki an-ban hai kyaa hai

rabt hai us ko zamaane se bahut suntaa huun
koi tarkib karun main bhi zamaana ho jaaun

putliyon par raqs karnaa hi kalaam-e-fan nahin
dard ke aansu ko to paiham ravaani chaahiye

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

thi niind meri magar us mein khvaab us kaa thaa
badan miraa thaa badan mein azaab us kaa thaa

ye kaisi aankh thi jo ro paDi hai
ye kaisaa khvaab thaa jo bujh gayaa hai

rakh liyaa thaa main ne roza jaan tumhaare naam kaa
tum ko dekhaa khvaab mein aur meri sehri ho gai

aaj ki shab khvaab mein baatein hui hain jin se meri
yaa-khudaa ik roz ho jaae mujhe didaar un kaa