giraa thaa bojh koi sar se mere — Kausar Mazhari

mausam-e-dil jo kabhi zard saa hone lag jaae
apnaa dil khuun karo phuul ugaane lag jaao

vahi qatra jo kabhi kunj-e-sar-e-chashm mein thaa
ab jo phailaa hai to sailaab huaa jaataa hai

jaane kis khvaab-e-pareshaan kaa hai chakkar saaraa
bikhraa bikhraa huaa rahtaa hai miraa ghar saaraa

nazar jhuk rahi hai khamoshi hai lab par
hayaa hai adaa hai ki an-ban hai kyaa hai

rabt hai us ko zamaane se bahut suntaa huun
koi tarkib karun main bhi zamaana ho jaaun

putliyon par raqs karnaa hi kalaam-e-fan nahin
dard ke aansu ko to paiham ravaani chaahiye

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

jaanib-e-kaaba tu kyuun le gayaa but-khaane se
mujh se divaane ko ai ishq na bahkaanaa thaa

vahaan se le gai naakaam badbakhton ko khud-kaami
jahaan chashm-e-karam se khud-ba-khud kuchh kaam honaa thaa

ku-e-jaanaan mein gar ab jaaein bhi to kyaa dekhein
koi rauzan na rahaa ban gai divaar nai

bosa jo rukh kaa dete nahin lab kaa dijiye
ye hai masal ki phuul nahin pankhuDi sahi