haal-e-dil us ko sunaa kar hai bahut khush 'kausar' — Kausar Niyazi

har marhala-e-gham mein mili is se tasalli
har moD pe ghabraa ke tiraa naam liyaa hai

bar-sar-e-aam iqraar agar naa-mumkin hai to yunhi sahi
kam-az-kam idraak to kar le gun be-shak mat maan mire

chand lamhon ke liye ek mulaaqaat rahi
phir na vo tu na vo main aur na vo raat rahi

apne vahshat-zada kamre ki ik almaari mein
teri tasvir aqidat se sajaa rakkhi hai

ai masihaa kabhi tu bhi to use dekhne aa
tere bimaar ko sunte hain ki aaraam nahin

jazbaat mein aa kar marnaa to mushkil si koi mushkil hi nahin
ai jaan-e-jahaan ham tere liye jiinaa bhi gavaaraa karte hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

qulzum-e-fikr mein hai kashti-e-imaan saalim
naa-khudaa husn hai aur ishq hai langar apnaa

jab se is dasht mein aayaa huun isi soch mein huun
ki bayaabaan mein kyaa soch kar aataa hai koi

manaayaa jaa rahaa hai gham tumhaaraa
puraani film dekhi jaa rahi hai

zindagi ek film hai meri
jis mein hansne kaa scene hai hi nahin