har marhala-e-gham mein mili is se tasalli — Kausar Niyazi

bar-sar-e-aam iqraar agar naa-mumkin hai to yunhi sahi
kam-az-kam idraak to kar le gun be-shak mat maan mire

haal-e-dil us ko sunaa kar hai bahut khush 'kausar'
lekin ab soch zaraa kyaa tiri auqaat rahi

chand lamhon ke liye ek mulaaqaat rahi
phir na vo tu na vo main aur na vo raat rahi

apne vahshat-zada kamre ki ik almaari mein
teri tasvir aqidat se sajaa rakkhi hai

ai masihaa kabhi tu bhi to use dekhne aa
tere bimaar ko sunte hain ki aaraam nahin

jazbaat mein aa kar marnaa to mushkil si koi mushkil hi nahin
ai jaan-e-jahaan ham tere liye jiinaa bhi gavaaraa karte hain

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

khatm hotaa hi nahin silsila tanhaai kaa
jaane kis darja masaafat mein hai Dhaali gai shab

ab aur sambhaali nahin jaati tiri hurmat
yuun kar gham-e-jaanaan meri nazron se utar jaa

zamin ke paas kisi dard kaa ilaaj nahin
zamin hai ki mire ahd ki siyaasat hai