apne sahraa se bandhe pyaas ke maare hue ham — Khaavar Jilani

sabhi kirdaar thak kar so gae hain
magar ab tak kahaani chal rahi hai

vaqt guzar jaataa hai lekin dil ki ranjish
dil mein baiThi ki baiThi hi rah jaati hai

ik chingaari aag lagaa jaati hai ban mein aur kabhi
ek kiran se zulmat ko chhaT jaanaa paDtaa hai

jiinaa to alag baat hai marnaa bhi yahaan par
har shakhs ki apni hi zarurat ke liye hai

yunhi bekaar main paDaa khud ko
kaar-aamad banaa rahaa huun main

banne vaali baat vahi hoti hai vo jo
bante bante yaksar banti rah jaati hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

pyaaso raho na dasht mein baarish ke muntazir
maaro zamin pe paanv ki paani nikal paDe

ab apnaa intizaar rahegaa tamaam-umr
ik shakhs thaa jo mujh se judaa kar gayaa mujhe

ye vaqt band darichon pe likh gayaa 'qaisar'
main jaa rahaa huun miraa intizaar mat karnaa

ye intizaar ki ghaDiyaan ye shab kaa sannaaTaa
is ek shab mein bhare hain hazaar saal ke din