ye vaqt band darichon pe likh gayaa 'qaisar' — Qaisarul Jafri

ghar lauT ke roeinge maan baap akele mein
miTTi ke khilaune bhi saste na the mele mein

zindagi bhar ke liye ruuTh ke jaane vaale
main abhi tak tiri tasvir liye baiThaa huun

havaa khafaa thi magar itni sang-dil bhi na thi
hamin ko shama jalaane kaa hausla na huaa

divaaron se mil kar ronaa achchhaa lagtaa hai
ham bhi paagal ho jaaeinge aisaa lagtaa hai

kitne dinon ke pyaase honge yaaro socho to
shabnam kaa qatra bhi jin ko dariyaa lagtaa hai

tumhaare shahr kaa mausam baDaa suhaanaa lage
main ek shaam churaa luun agar buraa na lage

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

intizaar aap kaa aisaa hai ki dam kahtaa hai
nigah-e-shauq huun aankhon se nikal jaaungaa

had se guzraa jab intizaar tiraa
maut kaa ham ne intizaar kiyaa

main sochtaa huun mujhe intizaar kis kaa hai
kivaaD raat ko ghar kaa agar khulaa rah jaae