ham ko jaanaa thaa kis taraf 'razmi'! — Khadim Razmi

umrein guzar gai hain asar ki talaash mein
kis naa-muraad lab ki duaa ho gae hain ham

kuchh is liye bhi vo sailaab bhej detaa hai
ki bastiyon mein raho aur khanDar bhi saath rakho

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

ghurur bhi jo karun main to aajizi ho jaae
khudi mein lutf vo aae ki be-khudi ho jaae