jin ko zamin dida-e-dil se aziiz thi — Khaleel Tanveer

parind unchi uDaanon ki dhun mein rahtaa hai
magar zamin ki hadon mein basar bhi kartaa hai

vo log apne aap mein kitne aziim the
jo apne dushmanon se bhi nafrat na kar sake

auron ki buraai ko na dekhun vo nazar de
haan apni buraai ko parakhne kaa hunar de

rusvaa hue zalil hue dar-ba-dar hue
haq baat lab pe aai to ham be-hunar hue

parind shaakh pe tanhaa udaas baiThaa hai
uDaan bhuul gayaa muddaton ki bandish mein

main kyaa huun kaun huun kyaa chiiz mujh mein muzmar hai
kai hijaab uThaae magar hijaab mein huun

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

khudaa-parasti kaa biij bo kar khudi kaa dil mein farogh dekho
yahin se jhuTe khudaa uge hain baDi khatarnaak ye zamin hai

juutaa nayaa pahan ke vo panjon ke bal chale
kapDe badal ke jaame se baahar nikal chale

dil ko ham DhunDte hain chaar taraf
aur yahaan aap liye baiThe hain

ham ne siine se lagaayaa dil na apnaa ban sakaa
muskuraa kar tum ne dekhaa dil tumhaaraa ho gayaa