bahut hain sajda-gaahein par dar-e-jaanaan nahin miltaa — Khalid Hasan Qadiri

kis se puchhein ki ham kidhar jaaein
yaad ab ham ko vo gali hi nahin

na aae tum na aao tum ki ab aane se kyaa haasil
khud ab to ham se apni shakl pahchaani nahin jaati

miri jaan teri khaatir jaan kaa saudaa
bahut mahngaa bhi hai dushvaar bhi hai

ghuTan to dil ki rahi qasr-e-marmarin mein bhi
na raushni se huaa kuchh na kuchh havaa se huaa

tumhaare naam pe dil ab bhi ruk saa jaataa hai
ye baat vo hai ki is se mafar nahin hotaa

ye vaqfa saaaton kaa chand sadiyon ke baraabar hai
vo ab aavaaz dete hain to pahchaani nahin jaati

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

ai be-khudi salaam tujhe teraa shukriya
duniyaa bhi mast mast hai uqbaa bhi mast mast

vo jis kaa shauq hai khilte gulaab mal denaa
gale milo to use bhi udaas kar jaanaa

havas ne toD di barson ki saadhnaa meri
gunaah kyaa hai ye jaanaa magar gunaah ke baad