mujhe shak hai hone na hone pe 'khaalid' — Khalid Mubashshir

kahin raanjhaa, kahin majnun huaa
vajud-e-ishq aalamgir hai

dasht-e-junun se aa gae shahr-e-khirad mein ham
dil ko magar ye saaneha achchhaa nahin lagaa

Tapak ke dida-e-nam se sadaaein detaa hai
jo ek harf-e-tamannaa dil-e-tabaah mein thaa

miri vahshaton kaa sabab kaun samjhe
ki main gum-shuda qaafila chaahtaa huun

anaasir ki ghani zanjir hai
so ye hasti ki ik taabir hai

tumhaari yaad kaa marham banaam-e-dil kar duun
tamaam hijr ke zakhmon ko mundamil kar duun

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

puraane khvaabon se reza reza badan huaa hai
ye chaahtaa huun ki ab nayaa koi khvaab dekhun

kam-zarf zamaane ki hiqaarat kaa gila kyaa
main khush huun miraa pyaar samundar ki tarah hai

apnon ki chaahaton ne bhi kyaa kyaa diye fareb
rote rahe lipaT ke har ik ajnabi ke saath