ye tamannaa nahin ab daad-e-hunar de koi — Khalilur Rahman Azmi

bhalaa huaa ki koi aur mil gayaa tum saa
vagarna ham bhi kisi din tumhein bhulaa dete

nikaale gae is ke maani hazaar
ajab chiiz thi ik miri khaamushi

ham ne to khud ko bhi miTaa Daalaa
tum ne to sirf bevafaai ki

dekhne vaalaa koi mile to dil ke daagh dikhaaun
ye nagri andhon ki nagri kis ko kyaa samjhaaun

haae vo log jin ke aane kaa
hashr tak intizaar hotaa hai

yuun to marne ke liye zahr sabhi piite hain
zindagi tere liye zahr piyaa hai main ne

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

meri khvaahish hai ki ji bhar ke use dekh to luun
hijr ke mumkina sadmaat se pahle pahle

suni na ek bhi zaalim ne aarzu dil ki
ye kis ke saamne ham arz-e-haal kar baiThe

ajnabi raaston par bhaTakte rahe
aarzuon kaa ik qaafilaa aur main

kyaa karun khilat o dastaar ki khvaahish ki mujhe
ziist karne kaa saliqa bhi ziyaan se aayaa

khvaab, ummid, tamannaaein, taalluq, rishte
jaan le lete hain aakhir ye sahaare saare